یہ ایک دائمی اور ابدی حقیقت ہے کہ نورِ محمدی صلی اللہ تعالیٰ علیہ وآلہ وسلم اول مخلوقات اور ساری کائنات کا ذریعہ اورتخلیقِ عالم و آدم علیہ السلام کا واسطہ ہے۔جیسا کہ صحیح حدیث میں آیا ہے اَوَّلُ مَا خَلَقَ اللّٰہُ نُوْرِیْ اللہ تعالیٰ نے ساری مخلوق سے پہلے میرے نورکو پیدا فرمایا اور تمام مکونات علوی وسفلی آپ صلی اللہ تعالیٰ علیہ وآلہ وسلم ہی کے نور سے ہیں۔حضور صلی اللہ تعالیٰ علیہ وآلہ وسلم کے ہی جوہر پاک سے ارواح ، شبیہات، عرش،کرسی، لوح ،قلم ،جنت و دوزخ ،ملک و فلک،جن وانس، زمین وآسمان ، بحار(سمندر کی جمع)، جبال(پہاڑ کی جمع) اور تمام مخلوقات ،عالم ظہور میں آئیں اور بااعتبار کیفیت، تمام کثرتوں کا صدور اسی حدیث سے ہے اور اسی جوہرپاک سے ساری مخلوقات کا ظہور رو بروز ہے۔اس حقیقت کے اظہار و بیان میں اہل علم حضرات عجیب و غریب عبارات اور مضامین کاذکر فرماتے ہیں۔